Ukiumut aningaasanut inatsiseqarfiusumut 2003-mut Inatsisartut aningaasaliissutinut inatsisigigallagaat pillugu Inatsisartut inatsisaat nr. 6, 17. oktober 2002-meersoq.
§ 1. Ukiumut aningaasanut inatsiseqarfiusumut 2003-mut Inatsisartut aningaasanut inatsisaata akuersissutigineqarnissaanut Naalakkersuisut piginnaatinneqarput akileraarutit inatsisitigut tunngavillit akilersinniarnissaannut Namminersornerullutillu Oqartussat isertittagaasa allat isertittarnissaannut. Naalakkersuisut aamma piginnaatinneqarput piffissami tassani Naalakkersuisut, naalakkersuisut ataanni suliffeqarfiit aamma suliffeqarfiit kiisalu iliuutsit allat inatsimmik, aningaasaliissutinut siusinnerusukkut inatsimmik allatigulluunniit aningaasaliissutaasimasunik tunngaveqarluni aallartinneqarsimasut attatiinnarneqarnissaannut ingerlatiinnarneqarnissaannullu aningaasartuutit pisariaqartut aningaasartuutigisinnaanissaannut.
§ 2. Nuna tamakkerlugu akileraarut allanngorani 11 %-imut aalajangersarneqarpoq. Immikkut ittumik nuna tamakkerlugu akileraarut allanngorani 24 %-imut aalajangersarneqarpoq. Kalaallit Nunaanni imaatigut usinik assartuinermi akit assigiissuunissaannut akileraarut allanngorani 9,82 %-imut aalajangersarneqarpoq.
§ 3. Inatsit 1. januar 2003 atuutilerpoq.
Namminersornerullutik Oqartussat, ulloq 17. oktober 2002
Jonathan Motzfeldt/
Augusta Salling
Siullermeerinninnermut siunnersuut